Йикъарикай ажеб са къуз,
Акъатна зун вини тамуз:
Ана зуьрнед сесер авай-
Жанавурдин мехъер авай.
Тамун жемят к1ват1 хьанавай;
Перленгни ц1егь сад хьанавай.
Элкъвез-элкъвез кьуьлер ийиз,
Вири авай кефер ийиз.
Мад са ихьтин мисал хьана-
Дамадайни чакъал хьана.
Кар чидайди лугьуз жеда-
К1унт1аллайди къудуз жеда!
Башламишна тебрик ийиз,
Гьар сада вич вилик ийиз.
Тек са аслан, фагъир хьтин,
Ацукьнавай есир хьтин.
Чан-чандак, къуватни авай,
Гьа гьакьван гъейратни авай.
Чакъал авай суфрад кьиле:
Къуллугъ авай вичин гъиле.
Ч1ар фейи тум к1евирзавай,
Зурбадаказ эмирзавай.
Гадарнавай сиягь, дафтар,
Чакъаларив вугуз гафар,
Асланни сев сеймиш тийиз,
Я т1ул вичин дегиш тийиз.
Хьайит1ани пака дуван,
Аданди я къенин заман...
Чакъал хьайла суфрад кьиле,
Тавханадкай жеда тевле...
Гьар сада гил фикир ая,
И кар жуваз таъсир ая,
Ви лайихвал к1ан ят1а ваз,
Ви макан масан ят1а ваз,
Чакъалдикай къавум мийир,
Къимет жуван магьрум мийир.