Сегьер-сегьер къарагъна
Экъеч1на зун куьчедиз,
Яру-ч1улав, цававай,
Килигзавай генжедиз.
Дагъларикай хкатна
Ялавди кьур чирагъди
Вучиз ят1ан хъверзавай,
Ярар кьулай, уьзягъдиз.
Сифте вегьей нурари
Гелерзавай синерал.
Яваш-яваш маларин
Акъатна сес, эверай.
Ац1уз шуьк1уь куьчеяр
Физва абур ч1урариз,
Къацу хьанвай дагъларин,
Цуьквер авай хурариз.
Экуь хьайи к1амара
Нурар гузва булахри,
Яваш-яваш юзазвай
Къацу пешер къавахрин.
Хуьр цвецерин к1унч1униз
Ухшар хьун - им къайда я.
Серсер жеда такурбур-
Аламатдин парда я...
***
Вири секин хьайила,
Са кьадар вахт алатна,
Кимел къвезва итимар,
Гьажимрадни акъатна.
Кака квахьай верч хьтин,
Ацукьна ам агъурдиз.
Яраб вучти дерди-гьал
Кват1а рик1ик фагъирдин.
-Я стха, вуч себеб яз
Чурудкай на ебзава,
Жува жуваз мурмуриз,
Ажугъар гуз, себзава.
-За вуч лугьун жемятар,
Кьвезивилин лишан я,
Мумкин я хьун делини:
Яшда авай инсан я.
Накь зи къунши Перидин
Савда алай гьаятдал,
Са зат1 рик1из герек яз,
Зунни анал акъатнай.
Къунши хуьряй атанвай
Кал хутахиз Алияр,
Са к1ус амай Периди
Гатаз адан далуяр.
Квез чида хьи Перидин,
Хъел атайла, сифте яз
Капач фида виликди
Рахун тийиз, муьфте яз.
Ч1алар галк1из лагьана
Периди заз:
-Я къунши,
Агъайрилай атанва
Зун алцуриз и вагьши.
Кал хканзва гьаваян,
Ван хьайида вуч лугьуй!
Кьил кьиликай хкудиз,
Акъудзава виш уюн.
-Я чан вах, вун секин хьухь,
Гьажимрада лугьурай,
Вуж ч1уру, вуж дуьз ят1а
Ада чи гьакь ат1урай.
А кас негьякь рахар туш:
Акьуллу са итим я!
Заз гьавай пул авай туш:
Зун са кесиб етим я.
Ахъайда за сифтедай
Чи савдаяр хьайивал.
Заз кунагьар герек туш,
Рази я зун гайивал.
Са варз идлай виликди,
Атанай зун кал къачуз,
Савдани дуьз авурлай,
Куьз герек я къал къачун?
Гъилер хъяна меслятдив,
Зун секиндиз хъфенай,
Варз хьайила хтанва,
Масад патав тефена.
Зи тахсир гил вуч хьурай,
Бегьем беябур хьана.
Нек авачиз са вацра
Эх авун мажбур хьана.
-Я стха, куь гафарин
Акьазвач зун гъавурда.
Мана хьайит1а хъсан я
Къугъвазвайдахъ чунгурдал.
-Ц1уд агъзуран Периди
Кал гана заз - баян я.
Савда авурлай кьулухъ,
Гила вучтин дуван я?
Кал туна, за лагьанай,
"Са вацралди хкведа".
Мад вуч ийин, геж хьана:
Акъатна зи келледай.
Вацра хъвайи калин нек
Ц1удалайни гзаф я.
Гьалал хьурай артухди!
Захъни авайд инсаф я.
Дикъетдивди жувани
Нек1ед кьадар гьисаба,
Элкъуьр ая пулуниз,
Аткидач чун азаба.
Мад са маса къуншиди
Гьисабариз эгеч1на.
Ц1усад лугьуз, уьзягъ яз,
Виликди ам экъеч1на.
Къал макъалдин ван хьайи,
Мад къуншияр к1ват1 хьана,
Кьадар-гьисаб акурлай,
Алияраз шад хьана.
-Агъзур манат залукни
Винел эхциг нек1един.
Мийир Пери шандакьар,
Юлдаш жемир лекедин.
-Я Аллагь, заз ахмакьар,
Са кьадарбур акунай,
Савдаярни меслятдив
Чпихъ галаз авунай.
Бес им вучтин к1ерет1 я,
К1ват1 хьанавай гьаятдиз?
Эхир зи квел хтана,
Килиг хгай къиметдиз!
Къал къачуна Периди,
Бегьем са силис хьана.
Яваш-яваш гьаятдай
Эхкъеч1на зун, пис хьана.
К1вале папаз ахъайна
Савдайрикай Перидин.
-Дели жезва къуншияр,-
Лагьана зи къариди,
-Дуьзгуьн мални туш амай:
Мижид адан къимет я.
Ц1усаданни гун тавун,
Перидинди къелет я.
Кимел алай итимар
Гьажетар гваз рахана,
Сада садаз зурар гуз,
Бегьем шулугъ аткана.
Къарагъна са кьвезида
Асадив чил гатана,
Инихъ-анихъ килигна,
Аста-аста лагьана.
-Ам акьуллу инсан я,
Геле авай гьалалдин,
Жеда жал ик1,- лагьана,
П1ип1 алудна кавалдин.
-Гьарда вичин гьайвандин
Тариф авун къариб туш.
Нек1ед кьадар Периди
Пара лугьун айиб туш.
Алияра цаварай
Къачунвай гьакь-гьисаб я.
Дуьз к1валахар авурдаз
Гьар са ч1авуз саваб я.
Зун гьакь яни, Алихан,-
Къуншидиз ам килигна.
Вилер к1евна, патав гвай
Кьвезидал гъил эцигна.
-Куьне авур савдаяр
Вири дуьз я, шак алач,
Амма заз чиз Алийран
Келледал бармак алач.
Алайт1а ам Перидив
Гьуьрметдивди рахадай,
Вичин калел къачунвай
Зегьмет адаз аквадай.
Вацра калихъ гелкъуьнар
Вири зарафат хьана,
Нек1ед кьадар гьисабиз,
Им вуч аламат хьана.
Бес гайи кьван ярмаяр,
Гьинай гъана Периди?
Агъзур манат вахкурай,
Язух хьурай къаридин.
Рази хьана Алихан,
Вичи гайи жавабдал,
Дамах гваз кьил хкажиз,
Вич са зат1дай гьисабна.
Акъатна югъ, йиф хьана,
Калин къамат чир хьанач.
Шиирдихъни гъилевай,
Мад вучин, эхир хьанач.
Пакад югъни акъатна,
Виридаз им сир хьана,
Квезни, аквар гьаларай,
И к1валах фикир хьана?