Рагъни амач,цавар кьунва цифери,
Сефил рикlикай лугьузва вилери.
Алатай вахтар хвейила рикlери,
Пашман жедачни бес,дагъларин тават?
Шегьердани кlан хьанач заз уьмуьриз,
Гьахъсузвал акваз уьмуьр жуван туьхуьриз.
Кар тавуна тадач жувал хъуьруьриз,
Пашман жедачни бес,дагъларин тават?
Иервал я бахт туш авачтlа кьатlун,
Рикlиз кlан хьайила четин ян акун?
Вун атун тавурла тахсирар кутун,
Пашман жедачни бес,дагъларин тават?
Хъвер хьунал пlузаррал шад жедач гуьгьуьл,
Кlандай са легьзе, жегьилвални,гуьл.
Кlанивал хьанайтlа ваз чlехи са гьуьл,
Шад жедай жал зун, дагъларин тават?