.. БЕЗАМТ1АБАХА ДЕГБУАМБЕШ Мустафа Ганижев
/Алистер вийша яьзъяь байт/
Са к1ай дошох дешаш хулаш мунда хьаеш
Цун когашка кортабетташ хулар к1ай нах.
Уж соцабе магацар цхьанна сага къадеш,
Из цар вахар хулаш сина аьла бартах.
Г1ийла сердалах белакъажар дар гойташ,
Басилгаш ц1елуш вай аьннача баркала.
Цхьа безаме бартбаккхара тара хул хьесташ,
Из безам кхоачашхинна зизай мерзала.
Безамах гуш сердал з1ы т1ахьажа къайлен,
Къегаш сийна б1аргаш ц1ув Кроули воаг1а,
Дашо гуйрен тара, ший беркатах саден,
Кхы а хьанна сийдергдар аз – оалаш ч1оаг1а.
Иштта хул-кха хьайза к1озалаш нийссадеш,
Маьлха сердала ловзаш, оаз йохийт цига.
Дега даима къахетаме зов доаг1аш,
Ц1ув Кроули вар ший дин да ала мега.
Сигала къаьга го, к1ормацех хин синош,
Делаш дотох сийрдахинна бийса ейта.
Баьццар арена сердалах, хетар денош,
Хозадар чудара, лерга тоам хулийта.
Цун оаз кхоачар форда бердашта т1асаца,
Ц1ув вицвала хьожаш вар ма хулла дайнар,
Из йийзар г1аьнах яра, догдаха сацца,
Езар кхоачаш, цо седкъашкар моаршал дахьар.
Ший вахар духьа ц1ув безамца садаьхаш,
Из к1аьдвалар е г1айг1а гучайоалаш цун.
Бриллиант къагача мо сердалаш лелхаш,
Доаг1ар 1индарг1а амар* цхьа б1арчча фун.
Ший безам метте бита, цхьа тешам болаш,
Дог делар, ц1ув вар аьнна доацаш, са даьха.
Юххера лоама т1а воал, лакхера хожаш,
Из дар цун вахар, вала везалга лаьрх1а.
Эй, сабаре хулдалар цунцар уш жинаш,
Седкъий сердал г1амашта д1ателаш хилар.
Г1орбаьча бетта т1ар, унзар яр йовхьамаш,
Даьсса лаьтта т1а форд гучбоала ма баьлар.
Кашара харшаш делаш, дахка бар г1отташ,
Ший узар ц1ог1ах ц1овзаш – сатема духьал.
Дар б1аргдайнар дог г1елдана, вар 1овожаш,
Цу унзар т1аьско фо хулар д1а-х1а дахал.
Цига цхьа садаккхар дар кхерама юххе,
Из жожг1атар ц1ара галинг юхь т1а хьокхаш.
Массанахьар доаг1ар догдилар цу лохе,
Бахьаш дега лазам цхьаккха бахьан доацаш.
Ц1ув ца1 вар лаьтта т1а кхы вац ала мегаш,
Цун безам байнабар, боадо цун т1ахьарца.
Дац цун денал е безам бац бала могаш,
Дошо ко лоац мотташ, лоац лоабат кулгаца.
Ткъамашта г1аттар хул г1умари гувнашта,
Гобаьккха харцо хьорчаяь, из ц1ув хинна.
Харц къарал дувлар цох шийбесса ми1ашта,
Дорха лоам-ц1оакъ хина, бера лувжа даьнна.
Дерриганена доаг1аш шайт1а дар мих1ар,
Цу сийна б1аргашта ц1а яр т1амехкаеш.
Далла лой хургба-кха низ цун духьал сехьар,
Цу б1ехачун дег1 д1а-х1а хургда доат1адеш.
Т1аккха йоаг1аргйий хьог1а из сага г1адал,
Ч1ирлехаш дог хьалдиза наькхачу ц1аьхха.
Сихлургда догдетдалар зиз дего къердал,
Цун хоза хьаш еналга д1ахайташ наха.
Езачун баге, юхь феникс мо дийналуш,
Шийца коталонаш яхьаш дезача ден.
Йистхургъя: «Са везарг, со дукха горгъяц хьоца!»
Из вежар цун: «Са езар, со халийта хьайца!»
01. 04. 2024 ш.