Гьашыкъ окъ чанчса да, санавгъа барман,
Йыллар йылланса да, тапмадым дарман.
Баш еллер уьфюрюп антын айталар,
Къайтмагъа сёз берип, гене къайталар.
Денгизлер толкъунуп сююне ярлар,
Хумну гюн къыздыра, айлана айлар.
Табиат чы ярай сюйген къызлагъа,
Къышлайгъан юрегин элте язлагъа.
Сюйме ант этсенг де, тийип ашгъа да,
Узакъ да къалмайлы гетдинг башгъагъа.
«Мен сени унутдум, унут мени де»,
Деген сёз ярам, сызлай гьали де.
Тек чул билдирмеймен башгъа булансан,
Огъар иржаясан кюрлю улансан.
Бетинг кюлесе де, гьислеринг ойнай,
Баягъы баш сююв юрегинг къыйнай.
Мени тюшлерингде сама да ая,
Денгиздей сюювюм толкъунлар чая.
Оьзюнг алдатгъандан гёрмединг пайда,
Ув берген сюювюнг излейсен къайдан?
Эсингдеми,сёзюнг ерге ургъанынг,
Яш юрегим сёгюп яра салгъанынг?
Къапунгну япсанг да гёзюнг ёл чыгъа,
Сен къышларда къойгъан яппа-яш къызгъа.
Гьали сен геч болдунг,бийик ярлар да,
Сюювюм къанай чы минг яралар да.
Гьали сен оьлгюнче минг тынышынгман,
Жанынг берер гюн де гёзалдынгдаман.