Хьана кьван, хьанач кьван са темпел сев.
Зулухъди вири севери хъсандаказ, экуьнилай няналди
нез, чпин чандакар ягълудив ац1урзавай вахтунда,
темпел сев валара ярхар хьана ялар ягъиз ацукьдай.
Юлдашри:
-К1валах ая, яргъи кьуьд акъудун патал маъ гъваш
жуван бедендал,- лагьайла, ада жаваб гудай:
-Зун и тамарин агъа я, гьавиляй заз са куьнихъайни
къайгъу авайди туш.
Гьа ик1а яваш-яваш яц1у живер къвана, кьуьдни атана,
гьаваярни мекьи хьана. Кьуд пад лацу хьана,
недай зат1ни гьатун четин хьана.
-Ваъ!-лагьана севре.- Ин саягъда тама къекъвердалай,
яб к1аникна ксайт1а хъсан я.
Ам гьахьна валариз, са фур хьтин чка жагъурна.
Кьуранавай пешер, кул-кус инихъ-анихъ чална,
са гьялдин чка туьк1уьрна ярхар хьана.
Йифиз адавай уьл-уьлел эцигна ахвар ийиз хьанач.
И пад, а пад элкъуьриз ада гуж-баладалди йиф акъудна.
Амма, гьеле эквни дуьздаказ тахьанамаз, адаз киц1ерин
элуькьдай ванер атана. Генани темпел сев, абур алатна
фидайбур я лугьуз, алай чкадилай къарагънач.
Амма киц1ер, кьулухъ гъуьрчехъанарни галаз, вичин
хамунал къвезвайбур тирди чир хьайила, ам къарагъна
катна. Киц1ерин ван-сес мад амач лагьайла, ахпа сев
къвазна. Югъ няни хьанвай.
Дагьардайт1уз фена ада са маса фура вичиз мес туьк1уьрна.
Винелай кьуранвай хилер, пешер вегьена ксана.
И йифни ада, ахвариз тефиз, са гужуналди акъудна.
Вичин жегьилвиляй, ахмакьвиляй адан келледиз Фикир-фагьум
къвезвачир: бес ничхирдин гел гакьунвай гъуьрчехъанри
адав мажал вугудани?
Экв жез-тежез мад киц1ер элуькьай ванер-сесер акъатна.
Ят1ани, сев, абуруз яб тагуз, архайиндаказ къатканвай.
-Къе зун авай чка ихтибарлуди я. Абур инриз акъаткун
мумкин туш,- лугьуз, фикирзавай.
Амма киц1ерин сесер лап мукьув акъатна. И сеферда адавай
геж хьана.
Шуьк1уь, кулкусар авай дагьардайт1уз катун четин тир.
Киц1ери, ахмиш хьана, адаз кьасар язавай.
Са гуж-баладалди, хирер хьанвай сев, абурун гъиляй ахкъатна,
катна. Мадни и юкъан няналди ам катна лап яргъариз акъатна.
Киц1ерин са ван-сесни амачир. Нафас-нафасдихъ текъвез
галат хьана, ч1арарикай ивидин к1урк1уц1ар куьрснавай сев,
са таран к1аник ярх хьана.
Адаз и бала вичин кьилел вичин темпелвиляй атанвайди
чизвайт1ани, ят1ани адан рик1и и кар кьабулзавачир.
Мад вуч ийин! Хьайиди хьана. Вилелай къвез авахьиз,
ада фикирзавай, вучтин чара аквадат1а.
Пара четин к1еве гьатнавай фагъир. Пуд лагьай сеферда
къутармиш хьун немумкин тир.
Гьа и агъур фикиррив, ярх хьана, ам гъамлудаказ цавуз
килигзавай. Белки ада Аллагьдиз ялварзавай.
Бес гьамайни Аллагьди халкьнавайди тушни?
Садлагьана адаз таран кук1вай лекьрен са еке муг акуна.
Къаткиналди хийир авач. Са гуж-баладалди, тапасрив
яц1у тар кьаз-кьаз ам винелди акьахна. Ам мукваниз
гьахьнамазди, гьасятда ахварал фена. Гатфарар къведалди
ам мад инжикили ийидай са касни хьанач.
Гатфар атана, ракъинин нурари хам чими авур вахтунда.
сев ахварай аватна. Вичикай, лагьайт1а, хьанвайди са леш тир.
Гуж-баладалди ам чилел эхвич1на.
Яраб ада мад ихьтин ахмакьвал хъийида жал?